點解我養養下狗會養貓貓? 咁真係要問下呢隻Shomo點解生得咁鬼得意啦.
事緣六年前, 我去一個做醫生既朋友屋企, 見到佢新養咗隻四個月大既貓貓, 個樣不知幾趣緻, 其實之前我未接觸過貓架, 無諗過貓可以好似隻毛公仔咁, 佢話呢隻貓, 係佢一個朋友隻狗叼番來俾佢主人既, 呢隻狗狗一向都會喺街叼d流浪小貓小狗俾個主人, 今次就喺大浪灣俾佢發現到Shomo喇 (查實Shomo咁靚, 我思疑佢係有屋企既, 可能只係行出門口曬個太陽, 無啦啦俾隻狗仔叼咗去啫, 唔該大家唔好報串我呀, 我唔可以無咗Shomo).
狗主人將Shomo (本來叫”Barry”, 後改名”牛牛”) 送俾我呢個醫生朋友 (其實我當時心裏面已經盤算緊點樣拎呢隻貓貓返屋企
), 點知我朋友話呢隻貓好嘈, 我朋友平時唔俾佢入房, 但朝朝佢一聽到我朋友鬧鐘響, 就會喺廳大叫, 唔俾我朋友番瞓.我朋友問: 你係咪鍾意佢, 你鍾意俾你啦, 還掂我嫌佢嘈. 嘩
, 仲唔lur飯應咩? 我朋友仲車埋我同Shomo返我屋企呀, 自此佢就成為咗我最錫既貓貓啦.Shomo仲為我帶來另外三個仔同兩個女tim, 遲d逐個介紹啦.
順帶一提: Shomo真係好嘈, 佢超多野講, 又鍾意駁嘴, 花名叫”多口仔”, 仲有個乳名叫”麼麼”.
你睇衰Shomo細個個樣係咪好得人鍾意?
其實貓貓同狗狗都係一咁可愛,HEHE
回覆刪除原來shomo細個咁得意架!!! 終於可以比你得到佢! 大個左都一樣咁可貼呢! >w<
回覆刪除哇, 好得意呀, 真係好有衝動想去你屋企探下你的小動物呀
回覆刪除bubble_cici , 歡迎呀, 不過好多人嫌我住得遠, 我住西沙, 你有無聽過(之前有BE sis話聽都未聽過).
回覆刪除西沙係咪西沙公路o個邊啊, 如果係咪即係西貢lor, 不過西貢好鬼大, 如果去你度應該係咪由沙田入會快過西貢碼頭入黎?
回覆刪除bubble_cici , 好野wor, 一講你就知, 不過唔係沙田入, 正確d講係馬鞍山入, 由馬鞍山楂車, 五分鐘就到西沙啦, 基本上西沙公路係一直申出馬鞍山市中心, 我屋企唔太近西貢碼頭, 都要坐車或楂車, 但我都成日去西貢, 因為有朋友响西貢開cafe.
回覆刪除haha, 我以前做教會的, 上面位傳道人佢以前O係西沙O個邊定係返學途中會經西沙公路咁, 唔記得邊間神學院進修的, 所以我知大約咩地方, 但我都冇去過西沙, 對我呢O的九龍人黎講, 馬鞍山同沙田都係差唔多, 雖然中間差好遠路程, 但我比較少去馬鞍山, 所以講沙田LOR, 真係好有興趣想去你度同O的貓貓狗狗玩呀, 不過如果真係去你度就要過埋我考試先, 我要6月8日先考完
回覆刪除bubble_cici , 係呀, 過咗馬鞍山一入西沙係有間神學院架, 再前d就係我屋企啦, 你考埋試先啦, 到時可以再約.
回覆刪除好呀好呀, 原來我真係咁好記性, 真係有間神學院, 等我考完試就再約呀, 我諗都未到雨季, 一定玩得好開心o者
回覆刪除